काठमाडौं । सहिद स्मारक ए डिभिजन लिगमा फ्रेन्ड्स क्लब र थ्री-स्टार क्लबले बराबरी खेलेका छन् । मंगलबार दिउँसो भएको रोमान्चक खेलमा फ्रेन्ड्स र थ्री-स्टारले ३-३ गोलको बराबरी खेल्दै अंक बाढेका हुन् ।
च्यासल मैदानमा भएको खेलमा फ्रेन्ड्सको लागि कुशल फुयालले दुई गोल गर्दा उक्तामोभले एक गोल गरे । थ्री-स्टारको लागि मार्टिन्स अजयी, योगेश गुरुङ र प्रदीप लम्सालले समान एक-एक गोल गरे । खेलमा तीन पटक लिएको अग्रता जोगाउन नसक्दा थ्री-स्टार अंक बाढ्न बाध्य भयो । खेलको दोस्रो मिनेटमै मार्टिन्सले गोल गर्दै थ्री-स्टारलाई शुरुवाती अग्रता दिलाएका थिए ।
१४ औं मिनेटमा कुशलले गोल गर्दै फ्रेन्ड्सलाई १-१ गोलको बराबरीमा ल्याए । २४ औं मिनेटमा योगेशले गोल गर्दै थ्री-स्टारलाई फेरी २-१ गोलको अग्रता दिलाए । ४३ औं मिनेटमा उक्तामोभले गोल गर्दै फ्रेन्ड्सलाई २-२ गोलको स्थितिमा ल्याए । ८७ औं मिनेटमा प्रदीपले गोल गर्दा थ्री-स्टार जीततर्फ लम्किएको थियो ।
तर इन्जुरी समयको दोस्रो मिनेटमा कुशलले व्यक्तिगत दोस्रो गोल गर्दै फ्रेन्ड्सलाई ३-३ गोलको बराबरीमा ल्याउँदै टोलीको हार टारे । बराबरी सँगै दुवै टोलीले अंकको खाता खोलेका छन् ।
