जनकपुरधाम । नेकपा एकीकृत समाजवादीका अध्यक्ष माधवकुमार नेपालले देशका समस्याहरुलाई समाधान गर्नका लागि सबै राजनीतिक दलहरु एकजुट हुनुपर्ने बताएका छन् ।
आइतबार जनकपुरमा पत्रकारहरुसँग कुरा गर्दै अध्यक्ष नेपालले देशमा चुनौतीपूर्ण समस्याहरु देखिएका भन्दै ति समस्या समाधान गर्नका लागि सबै राजनीतिक दलहरु एकजुट हुनुपर्ने बताएका हुन् ।
उनले संकटको बेलामा सबै दलहरुले हातेमालो गर्दा राम्रो हुने बताए । उने भने,‘चुनौतीहरु सामना गर्नलाई देशका सबै राजनीतिक दलहरु एकजुट भएर जानुपर्छ । सबै मिल्नुपर्छ, त्यसमा एमाले पनि पर्यो । संकटको बेलामा, अप्ठ्यारो बेलामा हातेमालो गर्दा राम्रो हुन्छ ।’
अध्यक्ष नेपालले आफूले आलोपालोमा प्रधानमन्त्री पाउने भनेर बाहिर आएका कुराहरु अनुमानका कुराहरु भएको बताए ।
आफूहरुका बीचमा भएको सहमतिका बारेमा कुरा खोल्ने बेला नआएको उनले बताए । उनले वामपन्थी शक्तिहरुसँग मिलेर जानका लागि आफूहरुले आव्हान गरिरहेको भन्दै एजेण्डा मिल्नेहरुसँग सहकार्य गर्न तयार रहेको बताए ।
अध्यक्ष नेपालले सबैकुरा मिल्नेहरुसँग एकताबद्ध हुनसक्ने तर कुनै पार्टीमा विलय भने नहुने स्पष्ट पारे ।
