काठमाडौं। नेपाल कम्युनिस्ट पार्टी (माओवादी केन्द्र)को महाधिवेशन सम्पन्न भएको साता महिना बितिसक्दासमेत पदाधिकारी, स्थायी समिति, पोलिटब्युरोसहितको सांगठनिक कार्य टुंगो लगाउन सकेको छैन ।
लामो समयको गृहकार्यपश्चात् बिहीबार पदाधिकारी, स्थायी समिति, पोलिटब्युरो, नेताका जिम्मेवारी बाँडफाँटलगायत संरचना टुंगो लगाउने भनिए पनि आकांक्षीको अडानका कारण बैठक नै स्थगित हुन पुग्यो ।
माओवादी केन्द्र अध्यक्ष पुष्पकमल दाहाल ‘प्रचण्ड’बाट बिहीबारको बैठकमा पदाधिकारीलगायत विषयमा नामावली पेस गर्ने सहमति बुधबारको बैठकमा भएको थियो । पार्टी केन्द्रीय कार्यालय पेरिसडाँडामा बुधबारदेखि जारी स्थायी कमिटी बैठकले बिहीबार पदाधिकारीसहितको नामावली पेस गर्ने जिम्मेवारी अध्यक्ष प्रचण्डलाई नै दिएको थियो ।
तर, बिहीबार बिहान ८ बजे बस्ने भनिएको सचिवालय बैठक बेलुका ४ बजे बस्ने सूचना जारी भयो । तयारी नपुगेकै कारण साँझसमेत बैठक बस्न नसकेर आज शुक्रबार बिहान बस्ने अर्को सूचना प्रचण्ड सचिवालयबाट जारी भयो ।
माओवादी केन्द्र स्थायी समिति सदस्य एवं प्रवक्ता कृष्णबहादुर महराले आज शुक्रबार बिहान सचिवालय बैठक बस्ने बताए । यसअघि, उनले बिहीबारको बैठकबाट पदाधिकारी टुंगो लगाने बताएका थिए । तर, प्रतिनिधिसभा बैठकका कारण बिहीबारको बैठक स्थगित भएको बताउ“दै उनले ‘पहिलेकै एजेन्डामा छलफल हुनेगरी आज शुक्रबार बैठक बस्ने’ जानकारी दिए ।
नेताका आ–आफ्नै अडान
११ देखि १८ पुसमा माओवादी केन्द्रले आठौं राष्ट्रिय महाधिवेशन काठमाडौंमा सम्पन्न ग¥यो । यसबीच बसेको केन्द्रीय समिति बैठकले अध्यक्षमा पुष्पकमल दाहाल ‘प्रचण्ड’लाई सर्वसम्मत निर्वाचित गरेको थियो । साथै, केही केन्द्रीय सदस्यसमेत यसैबीच मनोनित भए ।
पार्टी विधानमा भएको व्यवस्थाअनुसार पदाधिकारी, स्थायी समिति, पोलिटब्युरो चयन केन्द्रीय समितिले गर्ने छ । तर, केन्द्रीय समिति बैठकबाट नभई अध्यक्ष प्रचण्ड अपूर्ण स्थायी समिति बैठकबाटै यी सांगठनिक काम पूरा गर्ने प्रयासमा छन् ।
माओवादी केन्द्र्रका एक स्थायी समिति सदस्यका अनुसार लामो समयदेखि अध्यक्षले पदाधिकारी, स्थायी समिति, पोलिटब्युरो टुंगो लगाउने प्रयास गरेका छन् । तर, विभिन्न पदका आकांक्षी नेताका अडानका कारण टुंगो लगाउन प्रचण्डलाई सकस परेको छ । सहमति जुट्न नसके अब प्रतिनिधिसभा र प्रदेशसभा निर्वाचनपछि नै टुंगो लगाउने निष्कर्षमा प्रचण्ड पुगेका छन् ।
पार्टी अध्यक्षपछि दोस्रो कार्यकारी र पछि पार्टी अध्यक्ष हुने मुख्य पद महासचिव हो । महासचिवमै विवाद भएका कारण प्रचण्डले अहिलेसम्ममा पदाधिकारी टुंगो लगाउन नसकेका हुन् । राजधानी दैनिकबाट
