USAID

बागलुङको ताराखोलाले ल्यायो ३६ करोड ६६ लाखको बजेट

बागलुङ  । बागलुङको ताराखोला गाउँपालिकाले ३६ करोड ६६ लाख ९२ हजार बजेट सार्वजनिक गरेको छ । गाउँपालिकाको दोस्रो गाउँसभा तथा प्रथम अधिवेशनबाट गाउँपालिकाका उपाध्यक्ष भीमबहादुर रोकाले प्रस्तुत गरेको बजेट वक्तव्यमा गाउँपालिकाले कृषि, शिक्षा, स्वास्थ्य, पर्यटन र कृषिउपजको बजारीकरणका लागि प्राथमिकतामा राखिएको छ । गाउँपालिकाले सङ्घीय सरकारबाट सशर्त अनुदानमार्फत प्राप्त गरेको १६ करोड ५४ लाख, वित्तीय समानीकरण अनुदान सात करोड ९९ लाख र राजस्व बाँडफाँट बाट छ करोड ७३ लाख २६ हजार प्राप्त गरेको थियो ।

त्यस्तै गण्डकी प्रदेश सरकारबाट समानीकरण अनुदान ७९ लाख ६४ हजार, राजस्व बाँडफाँट ३८ लाख नौ हजार, सङ्घीय सरकार विशेष अनुदानबापत एक करोड २० लाख, सङ्घीय सरकार समपूरक अनुदान ७० लाख, गण्डकी प्रदेश सरकार समपूरक अनुदान ४० लाख र चालु आर्थिक वर्षको ८२ लाख ९३ हजार मौज्दात र आगामी आर्थिक वर्षको आन्तरिक आम्दानी ५० सङ्कलन हुने गरी गाउँपालिकाले ३६ करोड ६६ लाख ९२ हजार बजेट सार्वजनिक गरेको हो ।

गाउँपालिकाले चालु खर्चतर्फ छ करोड सात लाख, पुँजीगत खर्चतर्फ १४ करोड रु ६३ लाख २९ हजार, सशर्त अनुदानसहित चालु खर्च २२ करोड तीन लाख ६३ हजार विनियोजन भएको छ ।

पालिकाले कृषि विकासतर्फ एक करोड ५६ लाख २५ हजार, पशु विकासतर्फ एक करोड १९ लाख ६०द हजार, सामाजिक विकासको शिक्षातर्फ एक करोड १० लाख ८७ हजार, खानेपानी तथा सरसफार्यमा ९६ लाख, पूर्वाधार विकासमा पाँच करोड १२ लाख २० हजार, वन वातावरण तथा विपद् व्यवस्थापनमा ७० लाख, गाउँपालिकाको प्रशासनिक खर्चका लागि र छ करोड ४८ लाख १६ हजार विनियोजन गरेको छ ।

भातखानेडाँडा वडा नम्बर १ जाने सडक स्तरोन्नतीका लागि एक करोड ४० लाख, सादी हिल गाउँ पँधेराखोला, बराहखोला सडक स्तरोन्नतिका लागि ८० लाख, घुस्मेली सभाहल सडक स्तरोन्नतिका लागि ६० विनियोजन भएको छ । यस्तै पालिकाले कृषिउपजको बजारीकरण, जनयुद्ध घाइते तथा शहीद परिवारलाई भत्ता र विद्यालयमा निःशुल्क स्यानेटरी प्याडको व्यवस्था गरिएको बजेटमा उल्लेख गरिएको छ ।

बागलुङको ताराखोलाले सशस्त्र द्वन्द्वकालका शहीद, बेपत्ता र घाइते तथा अपाङ्गको स्मरणमा युद्ध स्तम्भ बनाउने भएको छ । जनयुद्ध दिवसमा सार्वजनिक बिदासमेत दिएको यो पालिकाले ‘द्वन्द्वका घाउमा मलम’ लगाउने गरी नीति तथा कार्यक्रममा पनि जोडेको अध्यक्ष धनबहादुर विक ‘हिमाल’ले बताए।

बजेटमा जनयुद्ध दिवश, शहीद सप्ताह कार्यक्रम सञ्चालनलगायतमा व्यवस्था भएको हो । यसका लागि २४ लाख बजेट विनियोजन भएको छ । जनयद्धमा ताराखोलाका २३ शहीद भएका थिए भने दुई जना बेपत्ता र दर्जनाैँ घाइते छन् । अध्यक्ष विकसमेत जनयुद्धका घाइते हुन् । उनको शरीरमा समेत गोलीका छर्रा अझै बाँकी छन् । गाउँपालिकाले आफ्नो सभाहलमा शहीदको तस्बिर सजाएर राखेको छ । शहीद सप्ताहमा उनीहरुको परिवार सम्मान गर्ने, शहीदका छोराछोरीलाई छात्रवृत्ति दिनेलगायतको काम गर्दै आएको छ ।

श्रमदान गरेर बनाइएको सडकलाई स्तरोन्नतिका लागि बजेट विनियोजन गरिएको छ । गण्डकी प्रदेश र सङ्घीय सरकारको अनुदानसमेत जुटाएर सडक चौडा पार्ने काम भइरहेको छ । तत्काल स्तरोन्नति गरेर बर्सातमा पनि नियमित सवारी चलाउन बजेटमा २० लाख विनियोजन गरिएको हो । गाउँपालिकाले शहीदपार्क निर्माणका लागि पाँच लाख बजेट विनियोजन गरेको छ । ताराखोलाले वडा नंं २ को ओसमरको गयार भन्ने स्थानमा उद्यानको तयारी छ । उद्यानसँगै २३ शहीदको अर्धकदको मूर्तिसमेत बनाइने छ ।

 

CivActsAd

Leave a Reply

Your email address will not be published.