संयुक्त राष्ट्रसङ्घीय महासचिव एन्टोनियो गुटर्रेस र इरानी विदेशमन्त्री हुसेन अमिर अब्दुल्लाहिनका बीच फोनवार्ता भएको छ । उनीहरुका बीचमा यमनमा विकसित पछिल्लो राजनीतिक अवस्थाका बारेमा कुराकानी भएको महासचिव गुटर्रेसका प्रवक्ताले जानकारी दिएका छन् ।
साथै उनीहरुका बीच इरानी आणविक सम्झौतका विषयमा पनि आवश्यक छलफल भएको जनाइएको छ । त्यस अवसरमा महासचिव गुटर्रेसले हाल यमनमा जारी रहेको भनिएको शान्ति वार्ताका लागि इरानले गरेको सहयोगका लागि इरानलाई धन्यवाद पनि दिएका छन् । त्यसैगरी शक्ति राष्ट्रहरुसँगको इरानको आणविक सम्झौतका बारेमा पनि उनीहरुका बीचमा कुराकानी भएको जनाइएको छ ।
