काठमाडौं । चारदेशीय टि-२० आई सिरिज अन्तर्गत आज हुने सिरिजको अन्तिम खेलमा नेपालले टेस्ट राष्ट्र आयरल्यान्डसँग खेल्दैछ । अल अमेराट क्रिकेट मैदानमा हुने खेल नेपाली समय अनुसार दिउँसो ३:४५ बजे शुरु हुनेछ ।
आज हुने खेल जित्दै नेपाल प्रतियोगिताको सुखद अन्त्य गर्न चाहन्छ । पहिलो खेलमा ओमानलाई ६ विकेट पराजित गर्दै सिरिजको शुरुवात गरेको नेपाल दोस्रो खेलमा युएईसँग २५ रनले पराजित भएको थियो ।
यता आयरल्यान्डलेपनि आफ्नो पहिलो खेलमा ओमानलाई ९ विकेटले हराएको थियो भने हिजो भएको दोस्रो खेलमा युएईसँग १३ रनले पराजित भएको थियो ।
यसअघि आयरल्यान्डविरुद्ध भएको दुवै भेटमा नेपाल पराजित भएको छ । सन् २०१५ मा भएको विश्वकप छनोटको खेलमा नेपाल ५२ रनमा अलआउट हुँदै ८ विकेटले पराजित भएको थियो भने २०१९ मा ओमानै भएको पेन्टान्गुलर सिरिजमा नेपालले १३ रनको हार बेहोरेको थियो ।
यस्तै आजै हुने सिरिजको पाँचौ खेलमा ओमान र युएई भिड्दैछन् । खेल दिउँसो ११:४५ बजे शुरु हुनेछ ।
