एजेन्सी । इङ्लिस प्रिमियर लिगमा म्यानचेस्टर युनाइटेड बराबरीमा रोकिएको छ । शनिबार बेलुकी भएको खेलमा साउथाम्प्टनसँग १-१ गोलको बराबरीमा रोकिदा युनाइटेडले शिर्ष चारमा उक्लिने मौका गुमाएको हो ।
घरेलु मैदान ओल्ड ट्राफोर्डमा भएको खेलमा लिएको शुरुवाती अग्रता जोगाउन नसक्दा युनाइटेड अङ्क बाढ्न बाध्य भयो । पहिलो हाफको २१ औं मिनेटमा रासफोर्डको पासमा जेडन सान्चोले गोल गर्दै युनाइटेडलाई शुरुवाती अग्रता दिलाएका थिए ।
४८ औं मिनेटमा एल्योनोउसीको पासमा चे एडम्सले गोल गर्दै साउथाम्प्टनलाई बराबरीमा ल्याए । बाँकी समयमा दुवै टोलीबाट थप गोल हुन नसक्दा खेल १-१ गोलको बराबरीमा सकिएको हो । बराबरीसँगै युनाइटेड २४ खेलबाट ४० अङ्क जोड्दै लिगको पाँचौ स्थानमा छ भने समान खेलबाट २९ अङ्क जोडेको साउथाम्प्ट्न दसौं स्थानमा छ ।
