एजेन्सी । पेरिस सेन्ट जर्मन(पीएसजी) कोपा डे फ्रान्सबाट बाहिरिएको छ । सोमबार राति भएको अन्तिम १६ को खेलमा नाइससँग पेनाल्टी सुटआउटमा ६-५ गोलले पराजित भएसँगै पीएसजीको कोपाको यात्रा समाप्त भएको हो ।
पार्क डेस प्रिन्सेसमा भएको खेलको निर्धारित ९० मिनेटमा दुवै टोलीबाट गोल नभएपछि पेनाल्टी सुटआउटमा पुगेको खेलमा नाइस भाग्यमानी रह्यो । पेनाल्टी सुटआउटमा नाइसको लागि मोर्गान स्चनेडेर्लिन, जिएन टोडिबो, योसेफ अटल, एमिन गोइरी, इभान गुसान्ड र डान्टेले गोल गर्दा एन्डि डेलोर्ट चुकेका थिए ।
यस्तै पीएसजीको लागि लियोनल मेस्सी, केलियन एम्बाप्पे, जुलिएन ड्राक्सलर, मार्को भेराट्टी, जुआइ बेर्नाटले गोल गर्दा लियोनल डानिएल पेरेडेस र जाभी सिमोन्स गोल गर्न असफल भएका थिए । जीतसँगै नाइस क्वाटरफाइनलमा प्रवेश गर्दा पराजित पीएसजी प्रतियोगिताबाट बाहिरिएको छ ।
