एजेन्सी । क्याटलान क्लब बार्सिलोना कोपा डेल रेबाट बाहिरिएको छ । गएराति भएको खेलमा एथ्लेटिक क्लबसँग अतिरिक्त समयमा ३-२ गोलले पराजित हुँदै बार्सिलोना प्रतियोगिताको अन्तिम १६ बाटै बाहिरिएको हो ।
सान मामेसमा भएको खेलमा एथ्लेटिकलाई जित दिलाउन इकर मुनिएनले दुई गोल गर्दा इनिगो मार्टिनेजले एक गोल थपे । बार्सिलोनाको लागि फेरान टोरेस र पेड्रीले एक/एक गोल गरे । खेलको दोस्रो मिनेटमै विलियम्सको पासमा मुनिएनले गोल गर्दै एथ्लेटिकलाई खेलमा अगाडि बढाएका थिए । २० औं मिनेटमा बुस्केटको पासमा फेरान टोरेसले गोल गर्दै बार्सिलोनालाई बराबरीमा ल्याए ।
८६ औं मिनेटमा मार्टिनेजले गोल गर्दै घरेलु टोलीलाई अग्रता दिलाएका थिए । इन्जुरी समयमा डानी आल्भेसको पासमा पेड्रीले गोल गर्दै बार्सिलोनालाई बराबरीमा ल्याएपछि खेल अतिरिक्त समयमा धकेलिएको थियो । अतिरिक्त समयको १ सय पाँचौ मिनेटमा मुनिएनले व्यक्तिगत दोस्रो गोल गर्दै एथ्लेटिक क्लबलाई ३-२ गोलको जित दिलाए ।
जितसँगै एथ्लेटिक क्लब क्वाटरफाइनलमा प्रवेश गर्दा बार्सिलोना प्रतियोगिताबाट बाहिरिएको छ ।
