म्याडग्यास्करका एक जना मन्त्रीले उद्धार कार्यमा खटिएको एउटा हेलिकप्टर समुद्रमा दुर्घटना परेसँगै सुरक्षित स्थानसम्म पुग्नका लागि १२ घण्टा पौडिएको बताएका छन् ।
“म मर्ने बेला भएको छैन,“ थकित देखिएका प्रहरीमन्त्री सर्जे गेलले भने । उनीसँगै यात्रा गरिरहेका सुरक्षा निकायका दुई अधिकारीहरू पनि दुर्घटनामा बच्न सफल भएका छन् । देशको उत्तरपूर्वी क्षेत्रमा डुबेको एउटा यात्रुवाहक पानीजहाजको खोजी कार्यमा सो हेलिकप्टर खटिएको थियो । अधिकारीहरूले बताए अनुसार कम्तीमा ३९ जना यात्रुहरू उक्त घटनामा मारिएका छन् ।
ट्विटरमा राष्ट्रपति आन्ड्री राजोउलीनाले मृत्यु भएकाहरूप्रति शोक व्यक्त गरेका थिए। उनले गेल र जीवित अन्य दुई अधिकारीहरूप्रति पनि श्रद्धाञ्जली अर्पण गरेका थिए । गेल र ती दुई अधिकारी पछि समुद्र नजिकैको छुट्टाछुट्टै सहरमा पौडेर आइपुगेका थिए ।
सोमबार भएको दुर्घटनाको कारण स्पष्ट भइसकेको छैन तर ५७ वर्षका गेलले आफूले “रात साढे सात बजेबाट बिहान साढे सात बजेसम्म“ पौडिएको बताए । उनले आफूलाई चोट नलागेको तर जाडो भएको बताए ।
‘म यो भिडियो प्रसारण गरिदिन आग्रह गर्न चाहन्छु ताकि मेरा परिवार, मेरा सहकर्मी अनि सरकारका अन्य साथीले देख्न सकून्। म जीवित र सकुशल छु,’’ गेलले माहाम्बुका गाउँलेहरूलाई भने । प्रहरी प्रमुख जाफीसम्बत्रा राभोआभीले समाचार संस्था एएफपीलाई बताएअनुसार गेलले हेलिकप्टरको एउटा सिटलाई तैरिनका लागि प्रयोग गरेका थिए । गत अगस्टमा मन्त्री नियुक्त हुनुअघि उनले प्रहरीका जिम्मेवारीमा तीन दशक काम गरेका थिए ।
