USAID

न्यायाधीशहरुलाई सरकारले दिएको पदक अस्वीकार गर्न नेम्वाङको आग्रह


काठमाडौं । संविधान दिवसका अवसरमा गरिएको पदक घोषणाप्रति नेकपा एमालेले आपत्ति जनाएको छ । आइतबार संविधान दिवसका अवसरमा नेकपा एमालेले आयोजना गरेको कार्यक्रममा नेता सुवास नेम्वाङले पदक वितरणप्रति आपत्ति जनाएका हुन् ।

उनले केपी ओली सरकारको विरोध गर्नेहरुलाई छानीछानी पदक वितरण गरिएको भन्दै आपत्ति जनाएका हुन् । नेम्वाङले पदक प्राप्त गर्नेहरुलाई पदक अस्वीकार गर्नसमेत आग्रह गरेका छन् ।

उनले नेकपा एकीकृत समाजवादीका वरिष्ठ नेता झलनाथ खनाललाई पदक दिएको प्रति आपत्ति जनाए । उनले भने, ‘एकजना नेता दिल्लीमा बसेर पार्टी फुटाउन सक्रिय हुनुहुन्थ्यो । उहाँले पदक पाउनु भएछ । यो भन्दा अचम्म के हुन्छ ?’

उनले केपी ओली सरकारविरुद्ध मुद्दा हाल्ने कानुन व्यवसायी, फैसला गर्ने न्यायाधीशलाई पदक दिएको भन्दै आपत्ति जनाए ।

उनले भने, ‘केपी ओली सरकारविरुद्ध मुद्दा हाल्ने र संवैधानिक इजलासमा बस्ने न्यायाधीशले पदक पाउनुभयो । म त्यस्तो आरोप लगाउदिन । पारी चितुवा करायो वारी सिंगारी हरायो भन्ने चिन्ता हो । यो ठीक होइन । माननीय न्यायाधीशलाई आदर गर्छु । यहाँहरुलाई तुरुन्तै पदक अस्वीकार गर्न आग्रह गर्छु ।’

राष्ट्रपतिबाट विभिन्न विभूषण, अलङ्का र पदकको घोषणा
संविधान दिवसका अवसरमा राष्ट्रपति विद्यादेवी भण्डारीले ९०३ जनालाई विभिन्न विभूषण, अलङ्कार र पदक प्रदान गर्ने भएकी छन् । मन्त्रिपरिषद्को सिफारिसमा राष्ट्रपति भण्डारीले ती विभूषण प्रदान गर्ने घोषणा गरेकी हुन् ।

नेपालको संविधानको धारा २७७ को उपधारा (१) बमोजिम गत भदौ २९ गतेको मन्त्रिपरिषद्को बैठकले विभिन्न मान पदवीका लागि देशको राजनीतिक, आर्थिक, सामाजिकलगायत विविध क्षेत्रमा योगदान गर्ने विभिन्न व्यक्तिलाई पदकका लागि सिफारिस गरेको थियो ।

पूर्वप्रधानमन्त्री कृष्णप्रसाद भट्टराईलाई नेपाल रत्न प्रदान गरिनेछ भने भने मन्त्रिपरिषद्का पूर्वअध्यक्ष सुवर्णशमशेर राणा र पूर्वप्रधानमन्त्री एवं नेकपा (एकीकृत समाजवादी) का वरिष्ठ नेता झलनाथ खनाललाई राष्ट्र गौरव पदवी दिइने भएको छ ।

प्रधानन्यायाधीश चोलेन्द्रशमशेर राणा, स्वर्गीय तुलसीलाल अमात्य, स्वर्गीय मङ्गलादेवी सिंह, मोहनचन्द्र अधिकारी, स्वर्गीय दुर्गानन्द झा र स्वर सम्राट स्वर्गीय नारायण गोपाल गुरुवाचार्यलाई महाउज्जवल राष्ट्रदीप प्रदान गरिनेछ ।

सुप्रसिद्ध प्रवल जनसेवाश्री प्रथम श्रेणी पाँच जनालाई, उज्ज्वल कीर्तिमय राष्ट्रदीप द्वितीय श्रेणी एक जनालाई, प्रसिद्ध प्रवल जनसेवाश्री द्वितीय श्रेणी २४ जनालाई, सुकीर्तिमय राष्ट्रदीप तृतीय श्रेणी ३९ जनालाई, सुप्रवल जनसेवाश्री तृतीय श्रेणी १६१ जनालाई, कीर्तिमय राष्ट्रदीप चतुर्थ श्रेणी आठ जनालाई, प्रवल जनसेवाश्री चतुर्थ श्रेणी ३१९ जनालाई र जनसेवाश्री पञ्चम श्रेणी १९० जनालाई प्रदान गर्ने गृह मन्त्रालयले सार्वजनिक गरेको सूचनामा उल्लेख छ ।

दर्जन बढी पत्रकार विभूषित

विभिन्न मानवदवीबाट विभूषित हुनेको सूचीमा राससकर्मी दुईसहित दर्जनौँ पत्रकारले पनि पदक पाउने भएका छन् । राससकर्मी भीष्मराज ओझा र रोशन सापकोटासहित विभिन्न सञ्चार माध्यमका आबद्ध पत्रकार विभिन्न मानपदवी, अलङ्कार र पदकबाट विभूषित हुने भएका हुन् ।

प्रकाशित सुचीअनुसार सुप्रवल जनसेवा श्री पदक पाउने पत्रकारमा तारानाथ दाहाल, डा. सुरेशप्रसाद आचार्य, हरिविनोद अधिकारी, कृष्णज्वाला देवकोटा, प्रतिक प्रधान, हरिबहादुर थापा रहेका छन् ।

त्यसैगरी कृतिमय राष्ट्रदीप पदक ओम शर्मा, गुणराज लुइँटेल, महेश्वर दाहालले पाउनुहुने भएको छ । त्यस्तै प्रवल सेवा श्री पदकबाट पत्रकार कवीर राणा, बद्री सिग्देल, ऋषि धमला, अजयबाबु शिवाकोटी, नेत्रकुमार केसी, मुकुन्द दाहाल, दिलभूषण पाठक, समा थापा, विश्वमणि पोखरेल, रविन सायमी, रवि मिश्र, अनिता विन्दु, निता सापकोटा, डा बालकृष्ण चापागाईं, शालिकराम सुवेदी, गोविन्द धिताल, माधव ढुङ्गाना, प्रकृती अधिकारी र गिरीराज निरौला विभूषित हुनेछन् ।

यसैगरी पत्रकार नारायण अमृत, चन्द्रशेखर कार्की, भुवन शर्मा, भरतबन्धु थापा, दिपक खरेल, गिरिजाप्रसाद अधिकारी, प्रभातकुमार झा, किसन राई, खगेन्द्र अधिकारी, सुनिल महर्जन, नगेन्द उपाध्याय, विष्णु खड्का, रेखा भुषाल, बृजकुमार यादव, आकाङ्क्षा शाह, नरेन्द्रकुमार साउद, लीला बराल, राममाया भट्टराई, भवानी कार्की, बृजलाल पासवान र डम्बरबहादुर अधिकारीलाई जनसेवा श्री पदकबाट सम्मान गरिने भएको छ ।


CivActsAd

Leave a Reply

Your email address will not be published. Required fields are marked *