काठमाडौं। काठमाडौं जिल्ला प्रमुख कार्यालयले कोभिडको अवस्था मूल्यांकन गर्दै नगर शिक्षा समीतिको निर्णयबाट आगामी असोज १ गतेदेखि विद्यालय खोल्ने निर्णय गरेसँगै काठमाडौं जिल्लाका विद्यालय, विद्यार्थी, अभिभावक तथा शिक्षा विभाग विद्यालय खोलाउने तयारीमा जुटेका छन्।
काठमाडौं महानगर शिक्षा विभागले विद्यालय, शिक्षक, अभिभावक, विद्यार्थी तथा स्थानीय पालिकाहरूसँग छलफल गरी सूचना संकलन गरिरहेको महानगर शिक्षा प्रमुख रामप्रसाद सुवेदीले जनाए। उनले भदौ २८ गतेभित्र सबै पालिकाले सूचना संकलन गरी कोभिडको अवस्था विश्लेषण गरिने काम अघि बढेको बताए। उनका अनुसार अवस्थाको विश्लेषण गरी कुन मोडेलबाट विद्यालय सञ्चालन गरिने भन्ने तय गरिनेछ।
‘मापदण्ड पूरा गर्ने विद्यालयको हकमा असोज १ देखि कक्षा ९–१२ सम्मलाई विद्यार्थीको भौतिक उपस्थितमै खोल्न दिने महानगरको तयारी छ,’ शिक्षा विभाग प्रमुख सुवेदीले नागरिकसँग भने, ‘सोहीअनुसार विद्यालयहरूलाई तयार गराइरहेका छौं।’ उनले थपे, ‘साना कक्षा अर्थात् कक्षा १–८ सम्मका नानीबाबुहरू छुकछुके स्वभावका भएका कारण स्वास्थ्य सुरक्षाको मापदण्ड लागु गर्नमा चुनौती देखिन्छ।
त्यही भएर कोभिडको अवस्थाको विश्लेषण गरी पूर्ण रूपमा सबै बालाबलिकाको भौतिक उपस्थितमै विद्यालय दसैंपछि मात्र खोल्ने तयारी विभागले गरिरहेको छ।’ सुरुमा माथिल्लो कक्षाका विद्यार्थी भौतिक उपपस्थितमै विद्यालयमा पठनपाठन हुन थालेपछि अन्य कक्षाका लागि पनि पूर्वतयारी विद्यालयहरूले गर्नेछन्। ‘भदौ २९र३० गते शिक्षा समीतिको बैठक बस्छ,’ शिक्षा विभाग प्रमुख सुवेदीले भने, ‘सूचनामा धेरै अभिभावक आफ्ना बालबालिकालाई विद्यालय पठाउने नै पक्षमा हुनुहुन्छ। त्यही भएर यो बैठकले विद्यालय खोल्ने निर्णय गर्छ।’
गत साता बसेको बैठकले कोभिडका कारण लामो समयदेखि विद्यालयको शैक्षिक गतिविधि रोकिँदा बालबालिकाको सिकाइ स्तर खस्केको र उनीहरूको मनोविज्ञानमा नकारात्मक असर परेको समीक्षा गर्दै बालबालिकाको भौतिक उपस्थितमै विद्यालय खोल्नुपर्ने अनिवार्यता देखिएको बैठकले ठहर गरेको काठमाडौंका तत्कालीन प्रमुख जिल्ला अधिकारी कालीप्रसाद पराजुलीले जानकारी दिएका थिए। नागरिक दैनिकबाट
